Exit Corpus vulgaris
Met apologie aan M v N en die gewone seekat.
Die poëet, doeksafpotsier, kan van die roede oprigting leer,
‘n gebrek aan ruggraat hidrodinamies besweer:
bewaar die vierkamerpomp se aanpor, die grysstof wat kopgee
aan limbiese drifte, vlugge vryversvoete, klandestiene tankatatoes
in situ op kikvorsnerf, skurf soos papiruspaperasse,
kultiveer kroonlugterkwatryne, keuwel
semensonette oor beerbuike in obsene
Antroposene burlesk, tier die bloubalrites
teen rigor mortis-sinodes, verklaar jou ledekant tot ligplint,
eikel en kloot tot weekdiergode, duimdu die deurtrekker
opsy, laai die beenhard-tjiesastok, sputter
‘n buikspraakinkkantasie– woordnaaklyf! –
en laat spaander deur ‘n waas van bellettrie
paraat met al jou vleessyne
gekenter, beliggaam, berym.
© Franco Colin, 2023