Pronatalistedag in Silicon Valley
Geagte kollegas – mag ek maar sê: Vatbares
vir die vibes van ons Vallei?
Ons almal totus in illis sel- en selfbewustes
kon met vertroue waarneem
hoe ons onder die vaandel van ‘n Midasbeeld
die uitdaging aanvaar het op die strydperk
hier ingebed: “Discontented Natality Attribute”
ofte wel DNA.
Enkele buitestanders
het uit moedswil dit “Disconnected” gemaak,
maar hul ballonnetjies is algou geprik
deurdat almal kon sien die openheid werk!
Heelwat lammertjies het aangekom.
En daar is die beloftes …
So ingelyf in ons Vallei
is voorop gestel die begeerte
om, teen die wêreld se beskouing van ons Vallei in,
voort te plant, te floreer, natuurlik in terme van
beskerming en bewaring hoogs noodsaaklik
vir wat ook al die spermutasies van beskawing behels.
Soos ek hier staan,
het ek julle almal lief, is ons
onbeskaamd op die voorpunt
van verkeer, gemoeid met oorlewing,
vra ons uit een mond: Bewaar ons van die dag
wanneer die I van KI nie net staan vir Intelligensie nie,
maar ook die terugkeer na die dierbare Inseminasie.
Die kersie op die koek uiteraard
die posisie waar die blote plesier
nie uitgesluit kan word nie
met steeds op die verhewe doel toegespits –
by gebrek aan ‘n beter definisie –
die grys stof waardeur ons
die welbedeling van “die ander tyd” bekom.
© Pirow Bekker, 2023
O, die erotiek van die bandelose elektronika!