Adhortatio
Vir Jonty Driver
(1939 – 2023)
Op ‘n koue wintersoggend
gevra om iets oor jou te skryf.
Lykdigte, nes opdragverse
eis retoriese strategieë,
sou jy beter snap as ek.
Hoe sal ek jou blou oë
kyk na hierdie vers?
Daardie priemende blik
beleef op ‘n koue wintersdag
in McGregor, eis adhortatio:
jou toestemming as mens
en digter; ‘n tyd lank staatloos
weens jou politiek. In Brittanje
kom jy aan, immer verlangend
na jou mense, land en jeug.
Nou is jy weer tussen ruimtes:
“Pack up the moon and dismantle
the sun”, leer Auden ons en mag
jy uiteindelik ‘n nuwe rusplek vind
tussen digters wat jou verstaan
met agtergeblewenes soos ek, Douglas
en vele ander, wat jou lof besing.
Stuur beste wense vir Stephen Watson
en Patrick Cullinan. Steeds verder,
verderaan, sal ons jou sekwensies lees.
© Joan Hambidge, 2023