Sirkelgang
Vir Johann Lodewyk Marais
By die lees van jou verse vanoggend
onthou ek ‘n aand in Les Marais
toe ons deurnag praat oor die digkuns.
Ekologies-besinnend met reise deur
Afrika; ek – daarenteen – na verre ruimtes:
by Machu Picchu en in Egipte veral,
op kliptafels en in hiërogliewe gelees
presies wat jy bedoel met ‘n sirkelgang;
die ouroborous én terugkeer na ‘n begin.
Vanoggend bars ‘n pyp in ons kompleks
met stromende water; gister breek ‘n glas
en niks kan dit alles perfek opvang nie.
Verskillende koerse met afdraaipaaie:
met die wete die “somer is ‘n dag oud”,
die lewe een lang bundel met afdelings.
Op hierdie wintersoggend – via Neruda
en Louw – oor wyshede, meditasies, besinnings …
ons lewe met ‘n drif ter wille van, ter wille van …
© Joan Hambidge