Reinaard die vos (berymde, vrye vertaling van Van den vos Reynaerde)
VERTALER: Henning Pieterse
Van den vos Reynaerde word allerweë beskou as een van die hoogtepunte van Middeleeuse, spesifiek Middelnederlandse, letterkunde. Die teks is teen ongeveer 1250 deur ene “Willem” geskryf. Reinaard is ’n diere-epos waarin op satiriese, parodiërende wyse die spot gedryf word met die hoofse samelewing sowel as met gewone dorpenaars en antropomorfiese dierefigure.
In Afrikaans het Reinaard sy invloed in die jakkals-en-wolfstories.
In sy inleiding tot hierdie vertaling wys Heinrich Ohlhoff daarop dat Middeleeuse letterkunde nie slegs waardevolle bronne is om die oorsprong van baie hedendaagse instellings (byvoorbeeld die regstelsel) te verhelder nie, maar dat dit bloot gelees kan word omdat dit genotvol is: “Die genot spruit dikwels juis uit die boeiende andersheid, die vreemdheid van wat uitgebeeld word − pratende diere en swaardgevegte, monsters en mirakels, vreemde maatskaplike strukture en toewyding aan ridder- en ander kodes.”
Reinaard kan ook direk van toepassing gemaak word op die hedendaagse Suid-Afrikaanse samelewing:
“Die verhaal van die sluwe, psigopatiese tweegatjakkals hoef ek jou nie te vertel nie. Skynbaar moeiteloos gee Pieterse lewe aan die diere met hul streke en giere en laat hy die opperbedrieër met sy slinksheid en schadenfreude praat en sing soos ’n kanarie. Die verhaal is aards en tydloos, die taal lewendig en lyflik en die boodskap meer relevant as ooit. ’n Mens kan nie anders nie as om aan Zuma te dink as jy lees van die geslepe vent se strategieë om ’n hofverskyning te
systap.” – Deborah Steinmair
OOR DIE OUTEUR
H.J. (Henning) Pieterse (gebore 1960) studeer tale en musiek aan die Universiteit van Pretoria en UNISA. Hy behaal die grade BA, BA(Hons) en MA al drie cum laude en die graad DLitt et Phil in Afrikaanse taalkunde (1995). In 1989 verskyn sy digdebuut, Alruin, wat bekroon word met die Eugène Maraisprys (1990) en die Ingrid Jonkerprys (1991). In dieselfde jaar is hy redakteur van John Boje se ’n Keur uit die Pelgrimsverhale van Geoffrey Chaucer wat bekroon word met die Akademieprys vir Vertaling (1990). In 1998 publiseer hy ’n bundel kortverhale, Omdat ons alles is, en in 2000 ’n tweede digbundel, Die burg van hertog Bloubaard, wat bekroon word met die Hertzogprys in 2002. Hy ontvang ook ’n ATKV-Toekenning in 2002. Sy vertaling van Rilke se Duineser Elegien uit Duits na Afrikaans is gepubliseer in 2007 en word in 2008 bekroon met die Nedbank-Akademieprys vir Vertaalde Werk. In 2018 verskyn sy vertaling van ’n keur uit die poësie van die Franse digter Michel Houellebecq, Tussen die abjekte en die eteriese. ’n Keur uit die poësie van Michel Houellebecq. Pieterse was ’n professor en Direkteur van die Eenheid vir Kreatiewe Skryfkuns aan die Universiteit van Pretoria, en is tans ’n professor in die Departement Afrikaans en Nederlands, Duits en Frans aan die Universiteit van die Vrystaat.
[Protea Boekhuis 2023. GENRE: Epos. Berymde vertaling . PRYS: R250.00 (BTW ingesluit). ISBN (gedrukte boek): 978-1-4853-1430-1. FORMAAT: 213 x 137 mm. HARDEBAND/SAGTEBAND: Sagteband. AANTAL BLADSYE: 220]