Blomseisioen
(Namakwaland)
Die aarde verf ‘n selfportret
van blommetjies se lentepret.
Spatsels verf val op die grond.
Kolle kleur vloei rond en bont
tot in die seisoen se inkleurboek
waar almal binneblydskap
tussen buitelyne soek.
Hoe vrolik sou vreugde wees,
as jy ‘n inkleurboek kon lees?
Introspeksie se dieper kyk
laat swart en grys gou-gou wyk
wanneer pers en wit en geel
sorgloos in die veld kom speel.
Kom lees bladsy vir bladsy…
Kom leef die kleur.
Kom asem in die blydskapsgeur.
En as jy langer as ‘n oomblik bly,
dan bly jy bly!
© Andrea Sieberhagen, 2023