Utopia
hỳ het by Apolla gesweer
wat óók by hóm verdwaal het
sy daagikse brood het wit poeier geword
sy eed, ʼn klúg
so sit hy saam met verdoemde eerlikheid
hỳ wat ʼn kwartpond kaas uit ʼn boedel gesteel het
toe steeds onder juridiese eed
almal, om een ronde oliekonka
in hierdie stink gettokamer in Parow
by die Tafel van Camelot
waar ʼn vrot matras in een hoek lê
jinto wydsbeen sit en lek ʼn hoenderbeen af
in die ander hoek ʼn priester vuil en verweerd
met ʼn halwe, geskeurde bybel in een hand
apologeties kweel oor bekering
vir vissies en brood sit en bid
hoeréérder
in sy hand kreukel ʼn kardoes drank
drie-enig sit hulle
filosofeer oor die wysheid van ʼn slang
wat homself ínsluk
bínnetoe vervel
iewers rook ʼn apteker buttons
iewers breek ʼn dienaar bottelkop af
‘vir djou stiek ek vidag’
sónder baklei, in harmonie
in één kamer
perfékte Utopia
© Anne-Marie Bartie, 2023
Briljant
Dankie Nardo