Ons lesers se Kersfeesgedigte (1)

 

Margaret Cordier

 

Feesmaal

 

Here bring vir ons U goue son

antwoord ons gebede wat wierook brand

in die mirre van duisternis

oor elk verskroeide land

 

laat wyses U ster weer sien

reisigers ‘n blyplek vind

die wat ver is van die fees

nader kom deur die Gees

 

dek vir ons ‘n tafel in die woestyn

waar almal en alleen, saamgetrek

in families vreugde vind –

verkwik word met U brood en beste wyn

 

*

 

Hennie Maartens

 

die heiland kom

 

skaapwagters en skape het dit gehoor

die heiland kom die heiland kom

die blye boodskap is oorgedra deur die enegele koor

die heiland kom die heiland kom

 

sterrekkykers het stip na die lug gekyk

die middelster het hulle oog gevang

hulle kon nie van die teken wegkyk

hulle hoorders het aan hulle lippe gehang

 

reg bo op ‘n stal in Bethelehem het die ster bly hang

tot almal se verbasing is ‘n kindjie daar gebore

tussen die strooi en skape is daar na ‘n bedjie verlang

sonder die geboorte is die mensdom verlore

 

die heiland kom die heiland kom

die heiland het ook vir jou en my gekom.

 

*

 

Anne-Marie Bartie

 

Kersfees op Noordhoek

 

die gemésde ooi is dae voor die tyd bewerk

saaltjoppies gesaag, ʼn sóg geslag vir wors

sorgvuldig, netjies gepak, gemerk

in die parafienkoelkas in die buitespens

heel kumkwart preserve sóét koerkoer-stukke

van die spensrak afgestof met soveel liefde

álles vir die geleerde broer uit die Kaap

ek, die broer se kind, ʼn vierdegeslag Van der Merwe

kleinste, jongste, vir wie die volkies op oukersaand

spesiaal voor die deur kom sing

Stille Nag met pláásneefs

een van landbouskool, een op pas

(met vergunning van Youngsfield)

ék, vyfuur Kersoggend, wat in die koeistal

tussen hooibale vir Maria en Jesus soek

niggie-dorp met haar uitklokrok

en nefie-dorp, ʼn skraal netjiese gentleman

ons wat sit-lê op plate skaapplaatsgras

op Kersdag, onder koel akkerbome

op Noordhoek se werf

Olifantsrivier se ruis ‘n ent pad-af

oompie se Joseph Rogers wat waatlemoen slag

soet rooi kroonstukke vir grootmense

Citrusdal-vrede in my kinderhart

my pa se laggie onder sy hoed

my má se trifle in laterjare

my eíe trifle daarna

my dogters se trifle vanjaar

my kleinseuns wat om my klóék

pláásfees nou n spóóknoot in my Onse Vader