lente in plettenbergbaai
vier suikerbekkies fletter die lente in
en ver agter ʼn seekantstraat druis
ʼn springgety in die lug
as vier suikerbekkies kwetter
en speldekussings losknoop
hang my hart aan ʼn geel bitoubos
val sag op sagter grys kooigoed
as vier suikerbekkies
mik-mik al om ʼn oranje kanferfoeliebos
haak die laaste winter agter die tsitsikammas vas
skep die son saffier uit die see
kan ek saam met ʼn seeman van ouds
ná winterreise sug
bahia formosa
ek is terug
©Rina Bester,2023