Vanaf Woensdag 27 Maart 2024 plaas ons, hopelik vir die volgende jaar, weekliks of tweeweekliks ‘n onderhoud met ‘n Afrikaanse digter.
Ons stuur aan elke digter dieselfde vrae. Dit is meestal algemene vrae wat nie oor ‘n spesifieke werk van die digter handel nie (sulke onderhoude sal steeds op Versindaba verskyn). Daardeur hoop ons om digters aan lesers van hulle werk bekend te stel. Dit is inderdaad so dat mense nuuskierig is oor die skrywers wat hulle lees en hierdie onderhoude kan veral in skole nuttig gebruik word om kinders en jong volwassenes se belangstelling in digters en die digkuns te prikkel, maar dit is ook ter genot van Versindaba se lesers.
Digters met wie onderhoude gevoer word, verteenwoordig nie noodwendig die “beste” digters in Afrikaans nie en die volgorde waarin plasings van onderhoude geskied, dui eweneens nie op ‘n bepaalde hiërargie nie.