Dusketyd
deur te struikel breek jy deesdae ‘n heup
of ‘n diskus tussen werwels gee meewarig mee
twee stelle trappe uitgeklim
word op Facebook gerapporteer
lidmaatskap aan ‘n mediese fonds
meer waardevol beskou as pêrels van weleer
die woord kanker word gedemp bespreek
terwyl jy vlugtig oor jou skouer loer
om jou blaas te ledig die laaste tyd
verg dat jy stilstaan en konsentreer
plastiese chirurge wys jou in hierdie dae
skouerophalend die deur
(selfs die gode blyk hul beperkinge te hê)
reise toendertyd die wêreld vol
word nou binnewaarts gesentreer
L’envoi
‘n lewe word gekarteer
deur ‘n handvol gedigte
in ‘n boekrak of op rekenaar
geskryf en vergeet
© Hendrik J Botha (April/2024)
Baie geluk aan al die wenners. Goed gedoen!
Diep resonansie met die blaas…..