Net ‘n metafoor
Kanker in hierdie dae ‘n metafoor
vir alles wat skeefloop of ontspoor,
die kwade telkens met die troefkaart:
Johannes die Doper slinks
deur Herodias onthoof;
kakiebos verdring gousblomme,
plastiek in die oseaan getransformeer
tot koolstof in die atmosfeer.
Die afdraaipaadjies van jou jeug
deesdae drogbeelde teen die muur,
laat jou rusteloos snags wakkerlê
bly soos kanker aan jou vreet:
die kop op die skinkbord
‘n immer herhalende refrein.
© Hendrik J Botha, 2024