Hartversaking
Satelliete dra twee oggendberigte
uiteenvliedend en tog vir die aarde
van kardinale belang:
‘n asteroïde het ons hobbels ontwyk
en onder die nuusdraers se neuse
laag in die suidelike halfrond verskiet.
En in ons buurland doer onder
is ‘n versigtige soektog geloods
om ‘n radio-aktiewe kapsule
wat van ‘n trok verlore geraak het
op te spoor en deaktiveer.
Teen ‘n oormag skamper getuienis
oor die getal sekondes
wat ‘n hartstilstand
draagbaar kan duur,
ry ‘n nugter gedig in my kop aan die pen.:
Ondanks woorde te kus en te keur
word twee na vore gestoot met ‘n keuse
“onskadelik” en “skadeloos”.
Vir die begin het “onskadelik” gewen,
maar “skadeloos” het die uitslag verdien
en “voorlopig” maak sin.
Maar hoe kon die hart soos die aarde
wat onder ryp en hittegolf ly,
nogtans in sy swakker ritme
botsels soos bakens bly plant?
© Pirow Bekker, 2024
Dis vir my lieflik. Die spel met taal ook.