Kante van kindwees
I
Die kind is vir ewig vasgevang in ‘n raam
sonder ‘n blertsie winterson op haar gelaat.
Haar oë is twee wydgeplante bome
vol wind en weer en droewig
op soek na lentebloeisels in die koue.
Dié klein tinktinkie wat moet wip en pik en vlieg
sit vasgegom, regop en volmaak
soos ‘n houtpop sonder ’n kraak,
met ‘n gerf blomme in haar hande vasgeklou.
II
Die kind speel buite onder die swanger son
en deur die blare val vingers goud
op haar gesig. Haar kop is ’n ballon
vol kinderdrome. Haar oë kyk wyd
en glinster soos die dou op blare.
Die kind eekhorinkie-klim in bome,
Sy trek die patrone van die bas
met haar vingers na. Sy hardloop
saam met haar hond rond en bak
modderkoekies.
In haar hande hou sy
’n konfytfles vol paddavissies.
©Marthé McLoud, 2024
Ek hou daarvan.