Vrou
Jy is eindelose afbeeldings
van vroue. Jy dra ’n klomp mense
in jou saam soos ’n Matroesjka pop
vol kleiner poppies
terug tot by jou komvandaan.
In jou is die slawe,
die Saartjie Baartman’s bespot,
weggevoer en verhandel
en dié wie se liggame ’n slagveld was,
verkrag en opgekap, die “So lyk ’n vrou”
met bloukolle en bloed aan haar gesig
en skouers, die broodwinners en enkelouers.
Jy kom ’n lang pad
deur die Arabiese woestyn,
as vlugtelinge regoor die wêreld,
oor die Drakenberge,
deur die duwweltjies en pendorings
van Distrik ses en die Kaapse vlaktes tot:
“Hier is Ek!”
Jou kreet is vir vryheid,
gelykheid en susterskap.
Jy is ’n monument sonder mure.
©Marthé McLoud, 2024