Die onskuld nou verlore
My studeerkamermuur is volgeplak
met vadersdagsketse en kersvaderbriewe.
Plek-plek kom die prente los,
die gevolg van seisoene
se beur teen swaartekrag.
Ek het geweet die dag moes kom,
maar hoe lomp en onvoorbereid
is ek vir hierdie afskeid uit sprokiesland?
Hoe dun is die lyn tussen feëverhaal
en werklikheid?
My dogter steek die rooi kruising oor
en beland plotseling aan die ander kant
van die pad, waar drake wag.
Ek pak alleen die Barbie-poppe op
en stoor dit in die garage.
© Jacques Boshoff, 2024
Ek is herinner aan die krag wat woorde kan hê.
Hierdie gedig het my vanoggend n hart-skyf gegee. Werklik pragtig, so mooi!
Een om te hou!