Die Boer
Vroegoggend by die eerste lig
sal ’n hanekraai, roep of fluit
die stilte oopsny
en sy plaas sal arms uitrek – ver
tot daar waar dit hemel word
en vir die boer môre sê:
Hier is jou beloftes
God stel jou aan
om meer te maai as wat jy saai
jy beloof om jou grond lief te hê
met jou hele hart tot die dood julle skei
gee nou die ploeg jou regterhand
die boer kry toestemming
om Gods water
in damme te keer
en dan met pype en pompe
oor Gods akkers te laat loop
dat óns in die sweet van sy aangesig
ook óns brood kan breek
droogtes kom
en die boer byt vas
tot wolke soos mofskape
in die hemel bymekaar bondel
en die kuddes nuwe spriete inwag
en die boer dans op reënmusiek
daar’s skape in die kraal
beeste in die kamp
trekkers onderdak
oeste op die land
kampdrade elektries
die hekke toegesluit
hier bly ’n boer
en hy glo God waak.
© Anton Döckel, 2024