Voetskrif
Op ‘n Sondagmiddag 3 nm
24 November 2024
boonop 24 grade alhier,
word jou dood aangekondig,
terwyl ek torring aan ‘n vers
oor die Iguazú:
‘n bruin naaldwerksakkie
met twee knope, 2 naalde
verskillende kleure garingdraad
rooi en blou en wit
van daardie hotel
reg in die duiwel se keel
dalk op die 31e Februarie?
Jy, digter van nietnotas,
met skrifsels goëlend
in ‘n taal gesalpeter in
hierdie land
oorhandig aan my ‘n kunsboek:
The 81 ways of letting go a late self
op ‘n vlug na Parys in 2019
waar jy afklim en ek ‘n verdere vlug neem
na my geliefde kontinent, Suid-Amerika
ruimte van beswering
én afwering …
die dood val ons altyd
in die rede en geen naaldewerk
sal die lakune wat jy agterlaat
kan toewerk nie, want jou
verbeelding
katalekties uniek
soos die Garganta del Diablo
waaraan ek nou woordeloos stik:
‘n omgekeerde J
teenoor BB
lewendood:
dood dog lewend.
© Joan Hambidge
So mooi. Dankie Joan.