Deepfakes
die bron en teiken word sorgvuldig gepaar
soos ʼn man met sy skadu
die kurwes bypassend
in hul kaak en wang
en vir ʼn skamele swink
ʼn soortgelyke gryns
wat in stiltes bly hang
maar ʼn heel ander kleur kleef
aan sy toon en gemoedelike praatjies
sluier tekens van hoon
woorde geweeg en sorgvuldig bepeins
pas telkemaal by die gees van die tyd
hy’s maar een tussen almal
want ons bedrieg in ʼn koor
en kies vreemdelingsvriende
en liefdes
wat ons onwaarhede glo
ʼn pandemie van eensaamheid
is glo die kwaal van ons tyd
al flous ek facebook-vriende
met ʼn fineer van egtheid
© Cobus Kruger, 2024