‘n Man van Vrede
jy
steeds verdoesel in jou jeugdige lapwerk
rebellie en durf, gedienstige vrees
klem die wapen beangs teen jou vas
nag en dag omring deur versengende vlam
wat onvrede vraatsig verteer
want geweld verbrysel bose geweld
deur die loop van jou aanvalsgeweer
die vredesduif is immers jou vaandel
gedrapeer in glorieryke reinheid
vlerke gesprei: ʼn seëngebed
oor jou en jou heilige stryd
maar ek gewaar die donker spook
van twyfel by jou oor
en newels van onrus verwring jou beeld
van die duiwe oorhoofs
nou skaars spektraal
soos rook in die wind
want geweld skep net skade
en vlam laat net as
© Cobus Kruger, 2025
Geïnspireer deur “Fighting for Peace”, deur Pieter Cronje