Genesis
“Ek belowe dat daar lig sal wees.”
En daar was lig.
“Ek belowe om die chaos
wat in die waters woon
te tem.”
En daar was orde.
“Ek belowe dat daar droë grond sal wees.”
En daar was grond.
“Ek belowe dat daar saad sal wees,
en dat die aarde sal wemel
en sal gons en sal spreek.”
En daar was vrug.
En die vrug val af. Die waters verswelg
ons. Die Leviatan verrys. Niemand
staan op hoë grond nie. Die mens
verlep.
Maar daar is lig.
Daar is orde.
Daar is droë grond.
Daar is ‘n Saad.
En daar is vrug.
Gebore uit die onvrug-
bare.
© Marieta McGrath, 2025