Werkdag
Na George Milwa Mnyaluza Pemba se The Road Diggers
Met hulle oë op die grond gerig
lig die mans in een beweging saam
- soos in ’n massavertoning –
die pikke hoog bo hulle koppe.
Hulle knipmes op en af in stilte
hulle arms en rûe is gehoorsaam.
Die pikke sing ritmies hulle eie lied
terwyl hulle die aarde oopkloof.
Die reuk van vars grond styg op
en klonte grond en klip verkrummel
voor voete. ’n Skaduwee-man met ’n stok
hou hulle dop – moontlik die voorman.
Die werkers se rûe raak kromboompies
hulle voete geankerde wortels in stadsgrond
en hulle arms gespierde takke terwyl hulle harte
op die maat van die pikslae teen hulle ribbes klop
en hulle lywe soos chlorofil die sonlig absorbeer
om te bot en hulle arbeidsvrug huis toe te stuur.
Na ’n dag se werk raak hulle asemhaling
sag soos die vlinderslag van ’n mot,
was die werkers sweet en spiere skoon
en keer terug na hulle enkelmatras
om môre voor dagbreek weer op te staan
en die grond verder in stukke te slaan.
©Marthé McLoud, 2025
https://www.straussart.co.za/auctions/lot/389-27-may-2025/249