Broers
voor daardie dag kom sal ons nog eers vergeld
sal ons ons broers dit nie sewe keer nie
maar sewentig maal sewe keer laat ontgeld
in die naam van elkeen se Skepper, die
naam van Liefde, vermoor en vermink ons
vrouens en kinders met tuig en mortier
ons ontheilig die heiliges van goud en brons
hul grond word deur ons bloeddors ontsier
is daar één met hande heeltemal skoon
met ‘n voetspoor wat nie kronkel soos die Nyl
met ‘n lag wat selfs sy vyand nie hoon
‘n hart gul soos die Jordaanvallei se geil?
sal ons eers dáárdie dag genade kan gee
eers in daardie dag vir ons ploegskare smee?
© Stephan du Toit, 2025