Carla Botha. Lesse in Wêreldreise

 

Lesse in Wêreldreise

 

i

In New York bekgevegte oor taal
nes straatkatte oor visgrate.
Ek bestel ’n Starbucks;
die barista antwoord in Italiaans

ek glimlag, sê dankie in Afrikaans.

 

Terug in my land

Blouberg se strand ’n pasgebleikte tafeldoek,
selfs die meeue skree in vreemde dialek —

al wat ek hoor ’n honger-gebed.

 

ii

 

San Francisco vroegoggend

’n pispot te lank in die son gelos.

’n Man skuit tussen struike
en verdwyn terug in sy verslete vaal tent

hoe anders ons wêrelde — ek opsoek

na skoonheid, hy na rus dalk vrede.

 

iii

 

In Parys, oorkant die Louvre,
verdwyn moeder se beursie.

Jare vantevore, Pretoria:
my eie beursie — skoonveld.

Miskien was daardie R20-00
’n subsidie vir iemand anders se broodnood,
maar in my kop is die dief
steeds die hoofkarakter

in my studentebegroting riller.

 

iv

 

Reise het altyd ’n prys:
hotelle sonder lugverkoeling

een klein dak-venstertjie.

 

En tog
vertroetel ons hierdie herinneringe:

die wind, die beursies, die tale, die sand —
die wêreld beroof ons net genoeg
sodat ons iets het om oor te lag
terwyl die paspoort geduldig wag
soos ’n hond by die voordeur.

 

 

© Carla Botha, 2025.