Corlia Fourie, die oudste dogter van die bekende skrywer Mikro (C.H. Kühn), is gebore op 11 Desember 1944 in Kuilsrivier. Sy spandeer haar kinderjare in die Wes-Kaap waarna haar familie na Pretoria verhuis waar sy haar skoolopleiding aan die Hoërskool Hendrik Verwoerd voltooi.
In 1965 behaal sy ’n B.A.-graad met Sielkunde en Afrikaans-Nederlands as hoofvakke aan die Universiteit van Stellenbosch. Sy werk aanvanklik voltyds as joernalis by o.a. Die Burger en Sarie, en later as vryskutjoernalis by Beeld, Huisgenoot en Rooi Rose waar sy ook verhaalredakteur word.
Fourie begin in die tagtigerjare fiksie skryf. Van haar bekendste werk is die drama Moeders en Dogters wat deur KRUIK sowel as vir die radio en televisie opgevoer is, asook die kinderboeke Die wit vlinder, Die meisie wat soos ’n bottervoël sing en Die towersak en ander verhale. Vir dié drie boeke het sy etlike literêre pryse, o.a. die MER- en Alba Bouwer-prys ontvang. Later verskyn daar ook twee kortverhaalbundels Sê en Liefde en Geweld, uit haar pen. Vir laasgenoemde ontvang Fourie in 1991 die ATKV-prys vir goeie, gewilde prosa. Van haar meer onlangse boeke sluit in die romans Alle paaie lei deur die Strand, Die geheime kamer en Tussen heinings.
In 2018 debuteer Fourie as digter met die bundel Die goeie vrou en ander mites.
Lees gerus ’n meer uitgebreide biografie op LitNet:
https://www.litnet.co.za/corlia-fourie-1944/
[Nota van die Versindaba redaksie: Ons wil graag nuwe en ou digters aanmoedig om vir ons opgedateerde profiele aan te stuur na taljard.marlies@gmail.com
Van ‘n digter wat al een of meer solo-bundels by ‘n erkende uitgewer gepubliseer het, versoek ons die volgende:
-
-
- ‘n Redelik onlangse foto in JPG-formaat
- ‘n Lys van publikasies (ook die belangrikste nie-poëtiese publikasies)
- ‘n Kort lewenskets wat inligting bevat oor o.a. waar en wanneer jy gebore is en grootgeword het, waar jy studeer het, watter beroep jy beoefen of waarmee jy jou tans besig hou, waar jy op die oomblik woon, ens.
- Enige ander interessante feite oor jou
-
Skryf asseblief die profiel in narratiewe vorm en nie as ‘n reeks feite ondermekaar nie, ten einde dit meer lesersvriendelik te maak.]