vuur – beskawing?
(Franschhoek)
wat is beskawing werd teen ’n natuurkrag?
ken vuur die verskil tussen ’n bloekombos
& ’n museum die Hugenotemonument?
onthou vuur nog die universiteitbiblioteek?
boeke & kosbare dokumente teen Tafelberg
vuur lek-lek haar roete oop na rykmanshuise
laat gesinne paniekerig gryp na waardevolste
besit & ontruim in angs – sonder lewensverlies –
bure plaas foto’s op FB van brandende dakke
vriende uit buurdorpe spring by met vlamtonge
almal in dieselfde sosiale medium vakuum wéét
dis elkeen vir homself & die duiwel vir die res
eiendom brand af – eiebelang & eiegeregtigheid
spring vurig oor & weer uit skreeuende kele
verwyte na langgekoesterde onreg bars los
beskuldigings by gebrek aan ondersteuning
as die duiwel in die detail van ’n bosbrand
se vuur dans verskrompel valse opregtheid
ontmasker vuur die dunste lagie beskawing
© Carina van der Walt
*
water & beskawing
(Krugerwildtuin)
wat is beskawing werd teen ’n natuurkrag?
ken water die verskil tussen ’n teerpad
’n brug & die walle van die Krokodilrivier?
onthou water nog die sinkplaathuisies in KZN?
fietse onder mangobome langs die Amanzi
water spoel genadeloos haar roete oop na
lappies mielievelde van wildtuinpersoneel
verander hulle land in ’n bruin waterdeken
met groen boomtopspikkels – daar bly níks
meer oor om te oes – deur wie? lewensverlies
tel 180+ whatsapp- & instagramfoto’s vloei
in strome op duisende selfoonskerms
die krag van water skok menseharte sag
bakkies ry naasbestaandes na droër kampe
waar ’n pa, ’n oom ’n neef in lyksakke lê & wag
helpers neurie troos – verdeel kos & komberse
4×4’s uit Skukuza ry dagbesoekers na die hek
internasionale toeriste word met ’n helikopter
uit ’n watergraf beskawing toe gered – hekke sluit
© Carina van der Walt