BESOEKTYD
dis drie-uur
en die glas-deure skuif oop
na die bekende grys gange,
fynbos-foto’s teen die muur,
spiraal-patrone op die gordyne,
medisinale reuk aan haar hande
haar weerkaatsing in die nooduitgang
het oud geword
vandag in kamer B11
luister hy na leonard cohen,
snork saggies,
sy hand klam in hare
die infusie drup en drup
onbewus neurie hy saam
“and jesus was a sailor when he walked upon the water”*
*Leonard Cohen – Suzanne
© Charité Mouton, 2026