Foto: Iselle Combrink
Die Dans
(ʼn beeldegroep deur Marcella de Boom)
alles dans:
die sterrehelderte, die stof,
die bossieveld, die krans,
die ganse Groot-Karoo se mof-
skape en lammertjies
wat onder hierdie oopbreeklug
hul kutteltjies kom laat
en op die hoogte se klipplaat
het ʼn kring figure gestol
in ʼn prekêre balans
van staal, sement en sand
met hande wat juigend ópstoot
teen die hemel en die horison
se kantelende uur
en op die rand
van hierdie jubeltrans
die dier, wat sit en wag en kyk
want “niks is dood, en alles dans
en reik na naamlose dinge uit”.
© Ilse van Staden, 2026