Spiraal
Margaret Cordier-Biermann
Verse wat inwaarts wentel, na die ontwakende mens. SPIRAAL is Margaret Cordier-Biermann se tweede Afrikaanse digbundel, ná haar debuut BUIGBREEK (Cordis Trust, 2021).
In een-en-vyftig gedigte, verdeel in vyf afdelings, wentel die bundel inwaarts — van die kosmiese spiraal van die skepping na die enkele mens wat ontwaak, van seestrome en DNS na die tydgees van kunsmatige intelligensie. Dwarsdeur dra die bundel één oortuiging: dat barmhartigheid uiteindelik oor oordeel triomfeer.
SPIRAAL staan in die Afrikaanse tradisie van die “religieuse vreugde in die aardse” — dié van T.T. Cloete en Sheila Cussons — waar wetenskap en geloof mekaar deurweef eerder as om teenoor mekaar te staan.
Oor die digter
Margaret Cordier-Biermann is ’n onafhanklike navorser, Afrikaanse digter en skrywer, woonagtig in Queanbeyan, NSW, Australië. Sy voltooi ’n BA-graad aan UNISA (Kriminologie en Sielkunde) en woon die Potchefstroom Skryfskool by (2019). Buigbreek is op RSG uitgesaai. Haar gedigte verskyn in verskeie bloemlesings — onder meer Gelykmaker (Cordis Trust), Genootskap vir Afrikaans, 2019, Flikkergram (Naledi) en Onthou is die dag wat breek(Naledi)
[Naledi. 2026. SAGTEBAND. FORMAAT: 213 X 137 mm. PRYS: R275.00. 76 BLADSYE. ISBN 9781997476528]