Ex unguine leonem
vir npvwl
ál wat ons kan doen is opsom en voltooi.
die son wat opkom teen die berg se glooiing
is so rou dis prehistories, postapokalipties
en die gang van ganse tyd. dan, die woord
“glooiing” is ‘n onderdeeltjie uit die oudoos
wat kan instaan vir ‘n hele talestryd.
vra ook hoeveel sproete, honde, kinders
en komete in ‘n lewe. want die antwoord
kan jy uitwerk in geheel, nie ná ‘n op-
en afgetrek nie, eerder deur ‘n uitkring
en verwysing wat kan voel wat voor jou is:
die kelnerin wat jou bedien: sy het die mooiste
vlekkie in haar nek. dit is ‘n soen, ‘n kaart,
‘n sterrestelsel, ook die merk van ‘n klou
se haal, ‘n vorm wat herhaal. en die ding
waarin die groot patrone bly bestaan,
dís die leeu wat ons noem “taal”.
© Loftus Marais, 2026