Foto 14: Naghemel by SALT
https://photos.app.goo.gl/yMJaFhYqpg1ETy678
Astraal
Laataand ‘n klop aan my deur:
’n ruimteman, in wit geklee
met ‘n helm wat helder reflekteer.
Ek nooi die vreemde besoeker in –
hy vertel van sy reise,
veraf bestemmings,
planete, komete en sterre.
Alles is tydelik, sê die ruimteman,
en dié klein silwerige planeet
is ons woning nie.
Ek vertel hom van my lewe,
wys foto’s van my ouers,
probeer hom imponeer
met ‘n kosmiese verwysing of twee:
James Webb is op Kersdag gelanseer,
en my pa is al dertig ligjare weg.
Hy weet, sê die ruimteman, hy weet,
voordat hy gemoedelik groet
met ‘n stewige handskoendruk
en in die stil nag verdwyn.
© Jacques Boshoff, 2026