Klipskerwe
Sutherland
Rôeveld
soutlekke vir Louw-spirasie
As die sterre sneeu
sprinkel in die donker dag
is dit Sutherland
sprinkels sterresneeu
val uit die donker hemel
Sutherland vonkel
*
daar’s ‘n duiwel in die puts
hoor hoe gorrel sy lag –
kind, netnou duiwel jy in
*
skilpad lê penskant bo
pootjies krabbel hemel toe
die swart hond sal vatplek kom kry
*
renosterbos droog uit
laat ons vuur aanslaan
en jou harpuis ruik
*
die gompou trap sedig
soos ‘n slippedraer
en rooijakkals tjau klaaglied
*
van die Rôeveld af sien jy oor die rand
van die wêreld, kyk daar is nog
Tankwa, Hantam, Boesmanland
op die handpalm Karoo
*
kalkoentjie trap al so, al so
dans lat die stof skuim staan
my hart is aan jou ge-blo’
*
ag was ek maar dood
was die pyn in my hart nie so groot
soos die gat waarin ek moet lê
te vas om my uit die kluite te grou
en hom weer te loop moer
*
kliprante en bossies op vlaktes
en ringmure meesterik geplak
met
skrefies waar geitjies klip-glip speel
© Anton Döckel, 2026
Treffend, Anton.
Mooi.