tafel vir een
‘n tafel vir een bevestig ek
en gaan sit in die hoek
oudergewoonte met my rug
teen die muur
ek is nie lank alleen nie
eers kom sit die seun met sy groen oë
sy hande skaam onder die tafel gevou
dan die donkerkop pa
netjies in ‘n knoophemp
sy oë stip op die deur
‘n ouer man met fyn hande
kom sit ook aan
ek kan hom nie dadelik plaas nie
tot ek die ongeleefde jare
in sy gesig herken
my monde eet
sonder om te praat
toe die rekening kom
skuif ‘n fyn hand
dit my kant toe
© johan swanepoel, 2026