Adriaan Coetzee se gedigte is in Nuwe Stemme 5 opgeneem en het ook op Litnet verskyn. Sy debuutbundel Gordel verskyn in 2014 by Protea Boekhuis.
Coetzee het grootgeword in die Bankeveld.
Hy woon op Sterkfontein waar hy sy eie tuinboubesigheid bedryf. Volgens Coetzee is hy in murg en been ’n tuinier, met ’n goeie kennis van die natuurlike omgewing waarin hy leef en laat leef.
Luipaardsvlei-stortingsterrein
’n Kantoorstoel wat eenkant
wag op wedergeboorte,
van vroeër se wolke versoen
in diep modderige spore
meter vir meter bo seevlak.
Ook ’n skoorsteenveër wat
onder malende meeue profiteer,
sy stowwerige veredos ’n geketter
ten hemele grys en wit pluim.
Naas ’n man met ’n globe plastiek
op sy kop, ek, wat die Ford se
onklaar starter aan ’n ander bedien
en soos beelde uit ’n asdrom dop
’n derde palm op palm bak vir ghwai
met ’n tiksel Best Blend stop.
(© Adriaan Coetzee 2013)