Posts Tagged ‘Anne-Ghrett Erasmus gedig’

Anne-Ghrett Erasmus. Die retoriek van ‘n stoel: (wingback/vlerkstoel)

Tuesday, May 5th, 2020

 

(vir Louis Neethling)

 

stoel : meubelstuk vir een persoon om op te sit –

vasstaande stelsel

stoel (w) ; spruit, ranke gee : uitgroei

 

Op twintig het stoel waarde gekry :

Definisie, gewigtigheid, vierpotig, vastig:

Wat die sittende omvou en omvorm

 

Voorheen slegs –

Babastoel, stootkarretjie, karstoel,

ook foto op die Victoriaansestoel in die voorhuis.

Later, leunstoel, luistoel,

regop-aan-tafel-eetstoel.

 

Toe op twintig, tref die werklike waarde van

Stoel (s.nw)

 

Waardig, in ‘n tuin op die grasperk,

Met ligte wat saamswem met ligspieëlings in die swembad.

Dit was nie ‘n hierjy stoel nie,

Dit was een van formaat:

‘n Wingback in fluweel oorgetrek,

‘n gróótmenéér wat toesig hou oor die lawn,

die liggies, die maan, die sterre, die groentjie liefde,

in die tuin

van Albertstraat

in Waterkloof

in Pretoria.

 

Avalon het die klank van lig oor die lawn gespeel.

 

Ja, moet nooit ‘n stoel onderskat nie.

Sy waarde dra gewig.

 

Terloops,

Vlerkstoele word nooit Rockers nie,

ook nie wiegstoele nie.

 

© Anne-Ghrett Erasmus, 2020

 

 

 

  •