Posts Tagged ‘Winternag Christo van der Westhuizen’

Christo van der Westhuizen. Winternag

Tuesday, July 7th, 2020

 

Winternag

 

O kil is ons stadsliggies

en banaal.

En blink bo die skyn-

heilige ou Transvaal,

flou soos anderman se genade

flikker straatligte in weerwil van skade.

En op die hoogste laagtepunt van die rand

versprei in politieke brande,

val ons nasate in by doeane

met wuiwende hande.

 

Hoe treurig, Eugène, hoe astrologies

bid ons nou met ‘n Skype-wit lyn,

wink stadsligte soos kat-ogies,

bekend soos diefwering en dooswyn.

Soos plaasmotte tot die lig aangetrokke

raak ons geblaker, afsydig betrokke,

‘n kontinentale geflonker en -fladder

in die oog van die adder.

 

© Christo van der Westuizen, 2020

 

(Hierdie gedig het voorheen reeds in “Taalgenoot” verskyn)

 

  •