ʼn Hele ruk gelede vra Ronel Nel my of ek lus is om aan ʼn projek deel te neem. Die idee is vir musikante om gedigte te toonset – ander mense s’n, of hul eie. Ek is nie seker of enige van my lirieke as gedigte op eie bene kan staan nie, so ek kies toe maar ʼn gedig van Gert Vlok Nel om te toonset. Die gedig se titel is “nee nee nie dit nie, nie noodwendig dit nie” uit daardie pragtige bundel van hom Om te lewe is onnatuurlik. Die projek het toe ʼn CD geword en is nou beskikbaar – gratis en verniet (weens ʼn ruim borgskap van Sanlam en wyle Boeke-Insig) by Boekehuis in Auckland Park, Johannesburg, asook by Protea Boekhuis in Pretoria en Stellenbosch. Gaan laai gerus ʼn kopie daar op en koop sommer ʼn paar boeke ook. Martinus Beukes van die Departement Afrikaans aan die Universiteit van Johannesburg het ʼn resensie oor die CD geskryf – lees dit hier. Die mooi foto op die omslag is by Trompsburg se stasie geneem. Helaas, dis hoe die spoorweghuise van ouds deesdae lyk.