Op die Law Library of Congress se webblad lees ek van ‘n hof in die Suid-Russiese provinsie Dagestan wat uitspraak ten gunste van ‘n skrywer gelewer het nadat hy ‘n eis van 150,000 dollar teen ‘n resensent ingestel het. Slegs 1,000 dollar is egter toegestaan. Volgens die skrywer se klagstaat het dié negatiewe resensie aan hom en sy gesin heelwat emosionele wroeging besorg, en dat die betrokke boek, sowel sy reputasie as skrywer, onherstelbare skade berokken is deur die resensent. Boonop ly hy nou aan erge hoofpyn, pyn in die bors en hoë bloeddruk. Beide partye het egter hul ontevredenheid met dié uitspraak laat blyk en beoog om daarteen te appeleer. Die Law Library of Congress se verslag is hier te lees.
Ai, ons arme resensente … Hulle ontvang reeds sóveel kritiek uit verskeie oorde en nou nog dít?! Waarskynlik sal die koerante, wat hopelik almal oor versekering teen regsaksies beskik, dié versekering nou ook moet uitbrei ten gunste van vryskutwerkers soos resensente … Ai, ai, wat ‘n droewe dag!
Nietemin, mag die son skyn waar jy ook al loop.
Mooi bly.
LE