Dit is welbekend dat Max Brod, jarelange vriend en vertroueling van Franz Kafka, nooit aan sy vriend se versoek dat al sy manuskripte en korrespondensie met sy dood vernietig moet word, voldoen het nie. Indien hy het, sou die moderne letterkunde ongetwyfeld vandag sonder een van sy belangrikste hoekpilare gestaan het …
Nietemin, toe Brod in 1939 na Israel uitgewyk het, het hy etlike onopgemaakte kartonhouers met manuskripte en briewe van Kafka saam met hom geneem. Daar het hy dit aan sy sekretaresse, Esther Hoffe, nagelaat, wat dit weer op háár beurt aan haar dogters, Eva Hoffe en Ruti Wisler, nagelaat het; steeds sonder dat die inhoud van dié kartonhouers bekend gemaak is.
Intussen het die Israeliese Nasionale Biblioteek egter ‘n saak teen die bejaarde Hoffe-susters aanhangig gemaak met die eis dat die inhoud van die genoemde houers openbaar gemaak moet word en volgens ‘n berig in The Guardian het regter Talia Koppelman dan inderdaad verlede week uitspraak gegee ten gunste van die Biblioteekdienste se eis.
So, beteken dit dat ons kan uitsien na ‘n hernieude belangstelling in die werke van hierdie literêre reus?! Ai, ai … Wat ‘n wonderlike vooruitsig.
***
Dan wil dit voorkom asof ons bloggers na ‘n stewige begin Maandag-oggend ietwat stoom begin verloor het aangesien daar vanoggend net een bydrae is om te rapporteer en dit is Andries Bezuidenhout wat reageer op ‘n artikel van Marius Crous wat oor debutante sedert 2000 handel en op The Free Library se webblad gelees kan word.
En bly maar op die uitkyk vir die struikrowers vandag, hoor.
Mooi bly.
LE