Louis Esterhuizen. Poëziecentrum in Gent verwissel van stuurman

 

Luidens ‘n berig by Knack.be is dit pas bekend gemaak dat die 31-jarige Carl de Strycker (foto) vanaf 1 Augustus vanjaar die bestuur van die Poëziecentrum in Gent by Willy Tibergien gaan oorneem. In 2010 was die 67-jarige Tibergien al onder druk om afstand te doen van die dubbelpos as direkteur van die sentrum en ook as redakteur van Poëziekrant, die sentrum se vlagskippublikasie. Tibergien, wat die tydskrif en 1976 tot stand gebring het en die sentrum enkele jare daarna in 1980, het egter vasgeskop en volgens berigte daardie tyd aangedui dat hy beoog om eers in 2013 te tuig neer te lê.

Willy Tibergien

Willy Tibergien

Die kritek teen Tibergien twee jaar gelede het in wese daaroor gegaan dat hy uit pas was met die nuutste ontwikkeling en die Vlaamse en Nederlandse digkunste; in ‘n redaksionele brief daardie tyd het hy egter onderneem om die Poeziekrant se aanslag radikaal te hersien: “Wij willen af van het etiket ‘literair tijdschrift’ dat bij te veel potentiële lezers en vooral bij jongeren te veel weerstand oproept,” het hy gesê. “Wij willen van Poëziekrant een boeiend ‘maandblad voor poëzie’ maken. De stap is klein. De nuance groot. (…) Een nieuw lettertype en de frisse rustige full quadri lay-out moeten de leesbaarheid vergroten. Ook aan de inhoud is en zal nog gesleuteld worden.”

En dit het hy inderdaad gedoen.

Net so het hy die Poëziecentrum in Gent gevestig as sekerlik die mees dinamiese poësie-inisiatief in die Lae Lande. Nie net huisves die sentrum volgens Gerrit Komrij die grootste versameling Nederlandse en Vlaamse bundels nie, maar dit is ook die tuiste van die Ernst van Heerden-versameling wat allerweë gesien word as die grootste versameling Afrikaanse poësie buite ons landsgrense. Voeg daarby die boekwinkel en ook die uitgewery wat hulle by die sentrum bedryf, en jy besef dat Tibergien iets baie spesiaals tot stand gebring het …

De Strycker, daarenteen, is tans nog as dosent verbonde aan die Universiteit van Gent en  ook as gas-dosent aan die Universiteit van Münster. Hy is egter reeds vir etlike jare betrokke by Poëziekrant as kernredaksielid en op vryskutbasis by ander projekte van die sentrum.

Indien jy dit gemis het, kan jy hier en hier gaan kyk na vorige stukke wat ek geskryf het oor Willy Tibergien en die Poëziecentrum. 

 ***

Poëziecentrum

Poëziecentrum

 

 

 

 

 

 

 

 

Bookmark and Share

4 Kommentare op “Louis Esterhuizen. Poëziecentrum in Gent verwissel van stuurman”

  1. Carina van der Walt :

    Dankie Louis, vir hierdie kennisgewing. Ek kon werklik in die afgelope jaar wat ek intekenaar is op die Poëziekrant niks sien van ‘n “stokkerig en oud-modiese” aanbieding nie. Inteendeel! My trots is natuurlik die 5 vertalings van T.T. Cloete se gedigte wat gepubliseer is in die Januarie/Februarie 2011-uitgawe (p.50). Die enigste ander Afrikaanse digter waaroor in 2011 in die Poëziekrant gepubliseer is, is Ronelda Kamfer se Nu de slapende honden in die Oktober/November 2011-uitgawe (p.84). Volgens my staan die aantal Afrikaans in die Poëziekrant by verre in die skadu van die aantal Afrikaanse digbundels in die Poëziecentrum. Nie dat mens ondankbaar is nie, hoor! Glad nie.

  2. Marlise :

    Carina daar was ook eenkeer ‘n wonderlike artikel in van Gilbert Gibson.

  3. Carina van der Walt :

    O? Dis wonderlik om te weet, maar ek kon nie sy naam opspoor tussen die 8 eksemplare van 2011 en die 2 tot dusver van 2012 nie. Dit moes eerder gewees het. Dis nou ‘n digter wat ek nie goed genoeg ken nie. Goed dat jy my aandag daarop vestig, Marlise. Ek’t nou BOOMPLAATS uit die rak gehaal om te lees. Het hy ook ander bundels gepubliseer?

  4. Marlise :

    Carina, dan is dit ‘n digter wat jy moet lees! Kan nie wag vir sy volgende bundel nie. Na Boomplaats, verskyn Kaplyn en Oogensiklopedie.
    Miskien moet jy ook in die 2010 of selfs 2009 uitgawes kyk. Hier ‘n skakel na ‘n Digstring toe: https://versindaba.co.za/2010/05/26/gilbert-gibson-another-roadside-attraction/
    Daar is ook resensies op hierdie webblad oor sy bundels.

  •