Weer eens
Soos Eybers en Krog.
Vir Jdl
Ek kom weer eens nie uit
met my digterlike budget nie:
‘n halfgekykte Short Cuts grom
in die swart DVD-speler.
Die kouewaterkraan gor
sonder water weens verbouings
en verbrekings by die bure,
‘n troostelose hemp
(let op die personifikasie)
kla sonder knope
en ‘n halwe Valentino-pizza
gril vir ‘n duisendpoot
langs ‘n blikkie Doom.
Hou jou by jou lees,
beveel Elisabeth Eybers
en Anna Krog, kenners op dié gebied.
Hoe de fok doen jy dit
wanneer jou eks onverwags sms
en soos ‘n haai deur die nette
glip na aanspraak op jou psige
en jy woordeloos en ontheemd
voel soos ‘n Russiese beer
in ‘n tropiese dieretuin,
terwyl die apies pis
op verbygangers?
Ek maak aanspraak
op my digterlike gespreksmaat,
hy bedien my altyd tog van raad,
en wens ek was iewers
in ‘n vreemde ruimte,
ver weg van huishoudelike ellende
met stof wapperend
vuil vensters,
en ‘n bril vol groenspaan.
© Joan Hambidge / 2013