nogtans
een oggend sal ek opstaan
die son sal flouer skyn
die luggie in die populierboombos
stiller nog stiller roer
die blare nie meer handeklap
die dam se dyk het oopgebreek
die water weggeloop oornag
en in die modderslik en kweek
onkant gevang verstrik versmoor
lê ‘n dooie skilpad omgedop
tog sal jy bly in elke weet
waarop my ore oë tong en neus
‘n vinger nog kan lê
die vuurklippe se skittering
laatskemer se lou net-nog lig
*
Meiringspoort
hasejag
rietbos grys winterpopulier
blaarloos blomnek en varkenskraal
seepwater
geel rots
skelmkloofdrif
watter boer het hier
so skuwerig rondgeloer?
aalwyndrif
dubbele drif
steweldrif
sanddrif
hemelklip
na al die drif
‘n sprinkel hoop liefde geloof
maar die lewe spoed voort op galop
witperdedrif
ou tol
wadrif
witfonteindrif
uitspan!
watervaldrif
ontploffingsdrif
gerolms
rooi uitspanningsdrif
respyt van die groot gedruis
die klip van die dinamietslag
tot by die vrugteboord
waar ‘n man ‘n vrou sag soen
pereboomdrif
bloupunt
opmetingsdrif
laaste drif
daar kom ‘n end
aan waar die water loop
of lankal droog staan teen die rif
ek sif die son
ek hou die lig
© Christine Le Roux / 2014