Apokopoësie
1
Sinkopieë
Wees maar rustig
leef met die aarde
in jou
aporiolities saam:
met vulkaniese are
Etnas en aortas
stente en St Helenas
cholesterols en Stromboli’s
pasmarkeerders voor die lawas –
leef maar rustig
in die basaltversteende bome
gooi oor die magmas
seëns uit met woorde
wat dobberend versmelt tot as –
volhardend
aljanderend, aljandrend
deur die bos
2
Apollatoom
Deur kluitjiesreën bedot
moet die aarde eenvoudig
terugkeer, gryp met stof
na stof, die duisendpoot
weer toelaat tot sy gebied, kop
tot die grond beperk
nougeset laat voetslaan
uit die lastigheid van turf
teen ’n sandkliphoekpaal op
na die mik te klim
van paal en ligter stut
en dop te word
met vir die kernson
’n knypie snuif daar in.
.
(© Pirow Bekker / 2017)