Gunther Pakendorf. deus absconditus
deus absconditus
vir mm walters, 17 maart 2021
jou groot huis moet nou ontruim word, thys
noudat jy hier nie meer is nie
hoeveel besittings het jy nie vergaar
in jou lang lewe nie
laaie en lêers en kiste en kaste
verborge kleinode en vergete skatte
eikehouttafels en eikehoutstoele
rakke en rakke vol
boeke, grotes en dikkes
dun digbundels (ja, ook jou eie)
teen mure of in `n wêreld deur glas
dig bymekaar by opperman, louw en ander
groot geeste, wysgerige verhandelings
oor mitologie en godsgeleerdheid
(dis mos vinkel en koljander)
met ‘n `n blik op die wydgestrekte
blou waters en die ewige blou lug bo
en wie wag hier onder in dié gewyde
ruimte op ons, dié blou-oog dametjie
met haar lenige lyf en skaam glimlag?
ja, voorwaar, dis sy, die gebenedyde
onder die vrouens, selfs meer as een,
blik op ons neer, vol grasie en genade:
die koningin van die hemel en moeder van erbarme
maar wag, waar is hy dan
ons liewenheer, haar seun van smarte?
(is sy `n moeder sonder `n kind dalk?)
is hy verborge
in `n boekrak bo by die
twyfelaars, afvalliges, ongelowiges
dié wat hom ontken, al sprekende van god?
glo jy nie ook
sy sal vir ons sondaars bid
as ons haar mooi vra nie?
© Gunther Pakendorf, 2021
