Joan Hambidge. Asindeton

 

Asindeton

 

Wat laat ek nie alles weg

in hierdie beproewende tyd?

Laat alles val wat lieg en wieraad was?

‘n Boodskapper op straat se meededeling

Haai-het-jy-gehoor-Schalk is dood?

(terloops) onvanpas on-medelydend.

Ons-is-almal-so-geskok dit was nie reg …

‘n Taxibestuurder wagtend buite om my te transporteer

terug na my bed vol onrus, onsekerheid en diskonneksies,

na ‘n solo-aand in die Oog-van-die-storm.

My kamerjas hang moedeloos oor die deur

nes ‘n ou bokser uitgetel in die kryt.

‘n Rotteplaag beset die woonstelblok

op soek na kos in hul plundertog.

Die buurvrou se pype het ‘n lekkasie;

bekommerd oor die effek op haar waardasie.

Meedoënloos oorrompel hierdie gedig

my nes ‘n mens dalk ‘n brand stig?

Onsamehangende beelde verloën

hierdie vers in kognitiewe dissonansie

bykans aangekom  dalk onloënbaar?

 

© Joan Hambidge, 2021

 

Bookmark and Share

Los kommentaar

 

*