a probatio pennae1: Hebban olla vogala…2
Vlaamse vadertjie
toe jy –
in die vaal kloosterscriptorium van Kent
met die gedurige gegriffel van veerpenne op perkament
soos die stil geskarrel van vaalmuisvoetjies –
die varsgesnyde punt van jou gansveerpen
moes proef
krabbel jy
op die skutblad van jou manuskrip
a pueritia memoria3
’n liefdesvers
uit jou vaderland
in jou moedertaal:
al die voëls het reeds begin nesmaak,
behalwe ek en jy…
was dit ’n geval van
wat die hart van vol is
loop die gemoed van oor
kom patertjie
buig jou stywe dop
en laat jou nonnatjie effe opsy
sê tog
op ’n manier
vir my
waarom wag julle toe nog…
© Cyril JM Clarke, 2021
1 “a probatio pennae”(Latyn) – ’n penpuntproef/penneproef
2 “Hebban olla vogala nestas hagunnan hinase hic anda thu”.
“Wat unbidan we nu?”
Vermoedelik Oudnederlandse reëls van ’n liefdevers (na bewering as penpuntproef deur ’n Vlaamse monnik-skriba in ongeveer 1100 op die skutblad van ’n manuskrip in ’n klooster in Kent, Engeland geskryf.)
Vry vertaal:
Alle voëls het reeds begin nesmaak, behalwe ek en jy.
Waarom wag ons dan nou/nog?
3 “a pueritia memoria” (Latyn): jeugherinnering