Ernst dos Santos. Sing vir my ‘n Koos-Doep song

 

Sing vir my ‘n Koos-Doep song

 

Skep vir my ‘n emmer son

vir die donker op my pad

blinddoek my met liefde

vir die onweer in my hart

 

rol my toe in jou donskombers

stook die kaggel

maak die deur dig toe

buite is ʼn storm wat woed

 

sing vir my ‘n Koos-Doep song

en laat my terugverlang

na lang dae en winteraande

met warm melk op die stoof

 

bring vir my reën uit die noorde

vir die droogte in my oë

lees vir my stories –

vir die honger in my siel.

 

© Ernst dos Santos, 2021

 

Bookmark and Share

Comments are closed.