Man-se-pen
in die begin was daar dood
en die dood het mens geword
om tussen tyd-se-poeletjies
te soek na die Kammakastigland:
ʼn wêreld met die wese van woorde-as-verstand
en die mens het gesoek en gesoek
én deur ʼn vloek
uitgekom by ʼn deur
wat hy tot sy sterwensdag
nie kon oopmaak nie, nie kon deurgang vind nie
en die dood het woord geword
om die mens in staat te stel
om te woeker met
– wat as man-se-pen bekend sou word –
tóg het die woordlose dood
die mens verskeep
in woord-se-boot
na vreemde kuste
waar vure van lettergrepe, grammatika
idioom-drome en nie-werklike mymeringe pols
en die mens het woord-se-boot
laat anker gooi aan vreemde kuste:
hóm te leer gesigte fatsoeneer –
hóm te leer gedigte fabriseer –
hóm te leer lirieke harmoniseer –
hom te leer hoe en wat en hoekom is dit die sing
wat aan die wêreldse konings hulde bring
man-se-pen het gewoeker met die dood
geloftes met hom aangegaan
sodat die sterkstes kon oorleef –
én vir ʼn ruk lank het woord-se-boot
koning van die konings gekraai
maar – ten laaste –
het man-se-pen homself drie maal verloën
en deel geword van die ideologieë van reisigers-van-die-nag
en die reisigers-van-die-nag
het ʼn afgodsaltaar
vir woord-se-boot gebou
en die seun-van-mens
aan die altaar vasgeketting
vir duisende jare van woord-loos-heid:
om in die duisternis oordeel te spreek oor:
man-se-pen
woord-se-boot
– en selfs – reisigers-van-die-nag
en in die duisternis
het die mens aangehou
om – op sy knieë – na woorde te soek
maar in al sy pogings kon hy nie
die aartsvyandige dood uitdoof nie –
en al wat van mens-se-lewe oorgebly het
was om – wanneer die nanag mooi en stil is –
te probeer om seun-van-mens van die altaar te bevry
déúr man-se-pen wat elke grepie lig kon bewerkstellig
sodat geen reisiger-van-die-nag óf koning óf duisternis
dit kon bedwang, uitdoof of aan bande lê nie
dit was per slot van rekening man-se-pen
wat woorde vooropgestel het
én in die handelingstransaksie
is woord-se-boot
weer ʼn regmatige plek
in die samelewing gegee,
alhoewel sommiges beweer
dat seun-van-mens
in die proses verraai is
en dat dit steeds woord-se-boot se modus operandi is
om hom soms doodstil sonder woorde agter te laat
dít, dan altans, soos wat die teenstrydighede dit sou wou hê:
totdat die woord Mens geword het
© Bester Meyer, 2022