Metamorfose
Ilse van Staden
Julia het ʼn middelmatige, middeljarige bestaan as optometris in ʼn onuitsonderlike dorp, maar is nietemin dankbaar vir drie seëninge: haar oë, haar hande en haar onafhanklikheid. Dan word haar lewe ontspoor deur ʼn ernstige besering. Haar betrokkenheid by die beplanning van ʼn sensoriese tuin, haar kunstenaarbroer se nimmereindigende nuwe idees en die plantkundige met wie sy aanhou paaie kruis, help alles in ʼn proses van transformasie waarvan die uitkoms vreemder is as wat sy ooit sou droom. Deur besinnings oor sensasie en persepsie, oor werklikheid en fantasie, oor skending en heling ondersoek die roman die mens se bestaan in ʼn komplekse wêreld waar die grense tussen wesens wasig word.
Ek het asemloos aan dié boeiende boek gelees. Die verwewing van wetenskap, kuns en fantasie is buitengewoon geslaag. Die karakters is interessant en oortuigend. Die taalgebruik vars en vindingryk. Wat kan ‘n mens meer van ‘n boek verwag? Niks, behalwe dat dit wyd gelees sal word! – Daniel Hugo
OOR DIE SKRYWER
Ilse van Staden (1972) is in Pretoria gebore, maar het grootgeword in die Waterberge in die Limpopoprovinsie. Sy matrikuleer aan die Hoërskool Pro Arte (Pretoria) en studeer veeartsenykunde aan die Universiteit van Pretoria. Sy voltooi ook ʼn BA-graad in Kreatiewe Skryfkuns aan UNISA. Haar debuutbundel, Watervlerk, ontvang die Eugène Marais- en Ingrid Jonker-prys. Sedertdien publiseer sy nog vier digbundels, ʼn kortverhaalbundel en twee romans. Die jongste is Palimpses wat in 2022 by Turksvy verskyn het. Sy praktiseer tans as veearts in New South Wales, Australië.
[Turksvy Publikasies. 2026.FORMAAT: A5. AANTAL BLADSYE: 166. PRYS: R270.00 (BTW ingesluit). ISBN: 978-1-0483-2139-5]
Verruklik is hierdie teks. Uitsonderlik en aangrypend.