Droom
In ‘n pynlike droom besoek ek die huis van my moeder weer
asof sy steeds leef en ek hoor haar stem soos in ‘n voice over
toe ons ry oor die Hoëveld en my moeder wat sê sy kan my nie lughawe
toe neem nie en my suster is in die motor en ons stop en ek gaan ‘n badkamer binne
en by die wasbak was ek my hemde vier almal rooi iemand stap die mansbadkamer
binne en ek weet hulle wag op my maar in die badkamer ruik ek die reuk van uitskot
(is dit hoe nostalgie se geur opwalm?) en toe ek buite kom het my moeder en suster
reeds vertrek en toe ek wakker word weet ek dit was net ‘n droom maar die verlange
na haar van wat was en ons tweemondige gesprekke en verder in hierdie droom poreus
gooi ek plante groen en geel nat nes my moeder die tuinier sou doen in ‘n droom pynlik
© Joan Hambidge, 2022